هي / هو لفت انتباهي

السلام عليكم ورحمة الله وبركاته

خطر هذا الموضوع الآن على بالي وأريد ان أطلع على أرائكم فيه

وهو

مارأيكم في مظاهر الأخرين ؟؟

كيف تحكمون على الشخص الذي تقابلونه ؟؟

من هو الشخص الذي لفت انتباهكم ؟

هل كان شخص جميل الشكل ؟

أم شخص ذو شخصية ملفتة ؟

أم شخص انيق في اختيار ملابسه ؟

أريد أن أعرف من هو ؟

صِفوه لي

ساكون سعيدة بمشاركاتكم جميعا دون استثناء

وعليكم السلام

موضوع مهم كتير

أنا بنظرتي الشخصية مابهتم بمظهر الآخرين لأن التياب أو الشكل مابتعكس جمال أو بشاعة الروح لأن بالنهاية الجمال جمال الروح

ومابحكم على شخص إلا بعد عشرة طويلة وبعد تجربة طويلة

بس أنا بيلفت نظري الشخص الهادي كتير أو العصبي كتير وبيتحرك كتير يعني على مبدأ إنو الأستاذ بالصف بيحفظ اسم طالبين الطالب الشاطر كتير والكسلان والمشاغب كتير

بس دائماً بكتشف إنو في أشخاص كان لازم اتعرف عليون من زمان بس مالفتوا انتباهي

ودائماً بحس إنوا هالأشخاص هدول هنن الأشخاص الأكتر غموض بحياتي



.... تحياتي ....

مشاركة رائعة شكرا لك

فعلاً أنا كمان هيك

يعني لما كنا بالجامعة أول شخص لفت انتباهي هو شخص عصبي ومشاغب بيحكي وبشارك كتير

وكمان شخص تاني ما بينسمع حسو .... وحتى ما بتحس عليه لما بفوت ولما بيطلع من كتر مو هادي

طيب هل هادا الشخص لفت انتباهك لوحدك ولا كان كل الناس منتبه لشخصيتو

يعني متل ما بيقولو شعبيتو بين الطلاب

مين اكتر شعبية بين الطلاب ؟

سواء بنت او ولد

مرحبا
اول شي انا برأيي لازم الواحد ليكون بيلفت الانتباه لازم يكون عمل شي
مثلاً الشخص المشاغب ابا بشوفو انو شخص حيوي وبيملك طاقة كبيرة وعم يفرغا بأسلوبو
والشخص الهادي ربما يكون متزن وربما بارد الاعضاب وهاد الشي بيشأأ التياب بلا موأخذة
بس انا من النوع الهادي والفوضوي يعني حسب المكان والتوقيت
بس يلي لفتلي انتباهي بالجامعة بنات كتير وخصوصاً يلي ما بيتصنعوا تصنع وهاد احلا الشي بالبنت
والعفوية شي جميل بيدل عالصدق ومنهون بتجي الشخصية الحلوة
لان الغرور مشكلة كبيرة وبين الثقة والغرور شعرة
............شكراً ليلى عالموضوع الحلو

الشكر الك اخي علي ع مشاركتك

حلوي جملة ( بين الثقة والغرور شعرة ) عجبتني

عملت اضافة رائعة للموضوع

أهم شي الواحد يبعد عن التصنع يعني مايعمل شغلات مانو متعود عليها أو يعمل حركات قدام شخص واحد مشان يلفت انتباهو

مافي أحلى من الواحد يتصرف على طبيعتو ..

وعلى قولة المدام هيفا ع الطبيعة كلشي حلو

هههههههه من كل الكائنات والبشر يلي عسطح الأرض ما لقيت غير المدام هيفا تقتبس منها

المشكلة احيانا الواحد مافيو يكون عطبيعتو

يعني بتيجي حالة جنان وبصير يتصرف بدون وعي بس مشان يخلي حدا ينتبهلو

الى الآن النتيجة لصالح الشخصية القوية والواثقة من نفسها

ما حدي جاب سيرة الشكل والجمال الخارجي

اليوم صارت شغلة غريبة معي

فعلا الشخص مستحيل تحكم عليه من مظهرو وتصرفاتو

محتاج تتعامل معو وتحكي بمواضيع كتيرة ومختلفة مشان تفهمو صح

يعني نحنا دائما منخبي شخص تاني جواتنا

شخص محتاج لوقت طويل مشان نعرف طبيعتو و أخلاقو

يعني ما تحكم لحدا ما تعاملت معو شخصيا

يعني أختي ليلك كأنك نسيتي تحكي الشغلة يلي صارت معك بس شغلتي بالنا وعطيتينا الحكمة

أكيد مافينا نحكم عالشخص من شكلو الخارجي وكمان مافينا نحكم عليه من خلال قعدة وحدة
لازم يكن في نقاشات كتيرة

وكمان لازم نشوف هالشخص هادا كيف بعيش حياتو .. كيف بعصب كيف بروق .. إلخ

ومشان الجمال__ أحياناً____ بكون جمال الشخص بيعكس جمال شخصيتو بس مو عطول

بعتقد في أسماء محددة بتحمل صفات مشتركة من بينها الجمال والهدوء وبياض البشرة وجمال العيون

... تحياتي ..

وسيم ماصار شي

بس هيك خطر عبالي الموضوع وكتبتو

جمال الشكل موضوع نسبي

فشخص أنا بشوفو كتير حلو ممكن بالنسبة لحدا تاني يكون عادي

ولو كان الانسان ملك جمال العالم

ممكن تصرفاتو واخلاقو تخلي شخص تافه أو سيء الطباع وبالتالي جمال شكلو ما رح ينفعو

هو رح يلفت الانتباه بس لفترة محددة وكتير قصيرة بعدين الناس رح تصير تبعد عنو