حكايتي بالكلية ...

السلام عليكم ورحمة الله وبركاته

خطر عبالي هالموضوع بعد ما عرفت انو رجعتي ع الكلية مطولة شوي

ويمكن ما ارجع

المهم الموضوع عبارة عن حكاية صارت معك بالكلية وما عم تروح من بالك وعم تتذكرها ليل نهار

تحكيلنا هالحكاية بدون ذكر الأسماء والتفاصيل فقط احداث الحكاية بشكل عام


أنا رح بلش بحكايتي وأكيد في حكايات غيرها كتير

كنا بالسنة الاولى عم ناخد محاضرة انجليزي

والدكتورة ( أكيد بتعرفو عن مين عم احكي ) المهم الدكتورة بتحب تخلينا نشارك معاها وطالعنا عاللوح وتسألنا

وكانت عطول بتفصل الشباب عن البنات

فبتخلي الشباب بجنب والبنات بجنب وبتعمل بيناتون منافسة

فكانت المنافسة كالتالي ( بتطلع بنت وبيطلع شب والدكتورة بتقرأ كلمات الدرس ونحنا نكتبها عاللوح بدون أخطاء املائية )

أنا طبعا كنت البنت يلي اختاروها الصبايا عشان تطلع عاللوح والشب كمان كان واحد شاطر باللغة الانجليزية

وبلشت اتملينا وبتعرفو محسوبتكون سيئة جدا باللغة فعشان هيك فتنا بالحيط وخربطنا بالكلمات وماعرفت اكتب كلمة صح والشباب فازو والصبايا خسرو وهذا كلو بفضلي والحمد لله

ما بنسى هداك اليوم لأنو كل ما عطتنا كلمة أنا احمر واخضر واقعد جرب بهالكلمات والطلاب وراي فرطانين من الضحك علي

طبعا أكلنا بهدلة من الصبايا وباسو التوبة انو يبعتوني عنون

خلصت الحكاية

هلق المطلوب كل واحد يحط حكايتو عن شخص معين أو موقف أو أي شي الو دخل بالكلية

سلام

واااااااااااو شو هالقصة

ولي مايصير معي هيك لاقعد ابكي واغرق بدموعي ومحدي رح يدرى فيني

أنا بعرفو لاستاذ المعادلات التفاضلية 1 كان يمني صح ........ كان عصبي بس بيضل ممبتسم وعطول بحب يطرد الطلاب

ناطرة قصة رنة التلفون

وشكرا لمشاركتك بالموضوع

هههههههههههههههههههههههههههههههههههههههههههههههههههههههههههههههههههههههههههههههههههه



موقف بفرط منيح لحقت حالك قبل مايطلعو الحراس كنت نمت بالجامعة ههههه

بس لو عملتلي تعليمة كنت طلعت زتيتك قصدي نزلتك من فوق

....... ........

السلام عليكم

أول مافتت عالجامعة كنت خايف ومتلبك كنت حس كل العالم عم تتطلع عليي بس بعدين اخدت وش ومشي الحال

المهم .. بالسنة الأولى الفصل الأول كان عنا محاضرة جيولوجيافيزيائية للدكتور جورج

الساعة 8 وتأخر الدكتور نزلنا سألنا بالقسم قالولنا الدكتور سافر ع الشام

نبسطنا كتير وفتنا عالقاعة أنا جبت معي كاسة ميلو وقعدت فوق الدرج وقاعدين شباب وصبايا

فجأة ومن غير سابق إنذار انفتح الباب وفات الدكتور بس مو أي دكتور

فات نائب العميد كان جايي يعطينا كيمياء1

أنا نصدمت وطالب مستجد مغلوب على أمري فايت بالحيط ..

بإيدي سيكارة وكاسة ميلو صرت عين عالدكتور وعين ع إيدي انا نصدمت والدكتور انصدم قلي بكل هدوء

تعا ...تعا ...تعا

أنا إجيت لعندو بكل براءة .. قلي طفي السيكارة ...طفيتا

حط الكاسة ... حطيتا

شو أسمك.. قلتلو عيسى

قال شو بتدرس ... قلتلو انا بدرس بالبتروكيميا..

إجا قلي هات بطاقتك ... قلتلو نسانا بالبيت ..

صار يعيط ويقول دقوا للجنائية جيبو الحرس

أنا وقف شعر راسي

بعدين أخد مني الموبايل وقلي بعد ماتخلص المحاضرة بتمرق لعندي بتاخدو

أنا صفرنت

بس بعدين راح معي رئيس الهيئة تامر وعملنا فك احتباس للجهاز واعتذرت من الدكتور وصرنا صحاب من بعدا

بس كنت رح انجلط كنت مفكرو رح يفصلني من الجامعة

.....تحياتي .....

هههههههههههههه

طيب انت الله يصلحك ليش لتكذب وتعمل هيك

يعني هي سيكارة وكاسة ميلو بتستاهل هالكذبة

بس والله مبين هالدكتور قاسي عشان يكون حازم معك بهالشكل

بس لا تحكيلي ع اول يوم ماتعرف انا شو صار فيني نهارتها ......... كنت رح بطل من الجامعة وشوي كنت رح ارجع عالبيت وأنا مرتكبة جريمة

بس الله ستر

شكرا لتفاعلك بالموضوع ... وما توقف هون أكيد في فصول تانية صايرة معك وخرج تنحكى

بما انو صار في حكي ع اول يوم معناتو شوفو شو صار معي

بالاول بدي احكيلكون ع موظفين كليتنا .. يلي محدي منون عرفان شي ... وبتصير تسأل حالك ليش هدول موظفين عنا بالكلية وهنين ما بيعرفو الله وين حاطون !!!!!!!!!!

المهم بعد ما خلصنا تسجيل ومشي الحال والحمد لله سألنا هالموظفة المحترمة امتى أول يوم دوام ؟

جاوبت وبكل ثقة : بعد العيد ... ( لأنو كنا برمضان والدوام بعد عيد الفطر )

المهم قعدنا بهالبيت ونطرنا .. والله بيوم من الأيام ( كنا لسه برمضان ) أنا شعرت بالممل وقلت لحالي خليني روح ادرج صوب هالجامعة واتعلم على الطريق واتفرج عهالعالم

انا وصلت عالجامعة لقيت العالم فيها متل النمل .. قلت بيني وبين حالي معقول لسه في عالم عم اتسجل ؟

المهم شفت عالم شايلي دفاتر وقاعدين بهالقاعات والدكاترة بغرفا والدوام شغال

أنا هون فتت بالحيط وما عرفت شو اعمل

صرنا نسأل هالطلاب تبين انو الدوام صرلو مبلش اسبوع والبرنامج معلق والمحاضرات عم تنعطى

انا دورت ع برنامجنا ولبين ما افهمتو صارت مية طوشة ولوشة ... على شو هي ؟ وشو هداك ؟

لانو متل ما بتعرفو البرنامج بينكتب بخط اليد وما بنفهم بسهولة

المهم تبين انو عنا محاضرة برمجة للدكتورة مها بالقاعة 12

وتعالو دورو عالقاعة 12 ... بعد ما ضليت شي ساعة وأنا عم افتل بهالكردورات واسأل تبين انو القاعة بالطابق التاني وملحوشة بالزاوية من جوا

وصلت عالقاعة لقيت شب وصبيتين ناطرين .. بدون يفوتو بس مستحيين .. المهم ضلينا نزور هالشب حتى قام وانتخى ودق الباب وفات ونحنا فتنا وراه

فوتتنا الدكتورة بس أكلنا بهدلة مرتبة

لانو الساعة كانت 11 ونص والمحاضرة امبلشي من الساعة 10

قعدت بالقاعة متل الأطرش بالزفة لا ورقة ولا قلم وما عم افهم شي من يلي عم تحكي الدكتورة

خلصت المحاضرة من هون وصرنا نسأل الطلاب يلي داومو بالاسبوع الماضي بدي أعرف شو اخدين

بس طبعا محدي رد علي وما اخدنا منون لا حق ولا باطل

وفي بنت مستحيل انساها شفت دفترها مكتوب عليه محاضرات وقاعدة بالمقعد الأول طلبت منها الدفتر لشوفو ما عطتني اياه

كرهت الجامعة والمحاضرات والدراسة لبين ما اتأقلمت مع الجو ولقيت صديقتي الغالية يلي مشتاقتلها كتير بهي اللحظة حبيت الجامعة والدوام والمحاضرات

وبتعرفو انو محدي عطاني محاضرات هداك الأسبوع وكملت الفصل بدون اول محاضرة من كل مادة

بس بعدين افهمت انو الدكتور ما بيعطي شغلات مهمة باول محاضرة

هاد اول يوم الي بالجامعة

قصة التلفون
في احد المحاضرات ولنفس الدكتور اعلاه كنا وكنا الدكتور عم يعطي محاضرة في اداب الحضور والجلوس في الصف ومنها ان كل طالب يغلق تلفونه او يحطة على الصامت وقتها كنت قاعد بالصف الاول و
كان عندي تلفون ومنزل عليه برنامج المؤذن وهذا البرناج وقت يقرب وقت الصلاه يحط الجهاز على الصامت وبعدين يرجعه اتوماتيكيا على الوضع العام وعندما يحطه على الوضع العام يصدر صوتا " بسم الله الرحمن الرحيم " بصوت مسموع وكانه رنه المهم الدكتور الي خلص حيكو وانذاراته وتلفون يحب التحدي (كان وقت صلات العصر ) بس الدكتور خلص حيكو وتلفوني نطق " بسم الله الرحمن الرحيم" انا حرجت وتلبكت والطلاب لفتوا الي بنظرة استغراب والدكتور التفت وبغضب انت شو اسمك قلت له اسمي بس ماطردني وقال طيب اقعد المهم ما نساني وجا وقت المقابلة وانتوا تعرفوا التكملة.!!!!

القصة حزينة

بتعرف انو أكتر شي مزعج بالانسان انو ما ينسى الخطأ وما يغفر ويضل حاقد لآخر العمر

والمزعج أكتر بالدكاترة انو لما يكونو معصبين بيتفشفشو فينا

أنا مرة في دكتور طردني من القاعة لأنو كان جاي معصب وكنت أنا بوشو ...سألت رفيقتي : المحاضرة اليوم عملي ولا نظري ؟

شافني الدكتور وطردني

والله الشاهد انو أنا عندي حرص شديد عند هاد الدكتور بالتحديد ما احكي ولا كلمة

بس هيك مالقا غيري فرحت فيها ظلم وبهتان وزور

السلام عليكم

بيوم من الأيام نزل قرار بإلغاء علامة العملي للرياضيات ولاإحصاء (علامة ال20)

نحنا كان عنا مادة رياضيات2 ورفيقي راسب بالمادة ونزلو إعلان بالجامعة إنو يلي راسب بالمادة وبدو يعيد عملي أو يثبت علامة العملي لازم يقدم طلب بالشؤؤن

كان آخر يوم لتقديم الطلبات يوم وقفة العيد وكان يوم أحد

المهم دقلي رفيقي من الحسكة وطلب مني قدملو طلب وبعتلي

صورة الهوية بالإيميل
نزلت الأحد

فتت عالشؤون

طبعاً الموظفة المحترمة قاعدة وبارمة

بوووووز شي مترين

...فتت مبتسم

قلتلا صباح الخير آنسة..

قالت:شو بدك.. بنشافة وكأني فايت أشحد منا

قلتلا بدي قدم طلب

ورحت اشتريت الطوابع وجهزت الورقة

حطيت الورقة قدامها

قالتلي إنت صاحب العلاقة..

قلتلا لا بس رفيقي بالحسكة ومابلحق يجي

هون حصل الإنفجار ....

انت مابتفهم ...ممنوع... مابصير... طلاب أغبياء....انقلع طلاع لبرا...

وكانت الغرفة مليانة بنات

أنا هون عصبت وارتفع التستسترون((مولد حس الرجولة عندالذكر))

لأعلى مستوى وانفتحت عليها

انتي يلي مابتفهمي .... نحنا جايين نتعلم ... ما منشتغل عند أبوكي ...

ومسكت الطلب وجعلكتو و زتيتو بوشها وضربت الباب وطلعت

بعد نص ساعة... برن جوالي ..رفيقي بقلي بدوياك نائب العميد((نفس الدكتور تبع كاسة الميلو والسيكارة))

رحت لعندو...

فتت وأنا متل المظلوم والحباب...

قلي حكيلي شوصار بالتفصيل

حكيتلو وحطيت بهارات عالقصة طلعت بتجنن

قلي الدكتور خلص يا ابني بعد العيد خلي رفيقك يجي وأنا بعطيه إستثناء

نزلت لعند الموظفة قلتلا بلا منيتك رح يمشي الطلب بعد العيد وجاكرتا ورفعت ضغطها ورجعت عالبيت [ندعوك للتسجيل في المنتدى أو التعريف بنفسك لمعاينة هذه الصورة]

.....تحياتي........... [ندعوك للتسجيل في المنتدى أو التعريف بنفسك لمعاينة هذه الصورة]

والله تبين انك مانك هين بنوب

الله يعين يلي بيعلق معك

وبعدين ارسالك ع بر .. يعني مرة بتكون الصادق الأمين ومرة بتنكش الكذبة وبتزبطها أشكال وألوان

ليش لما سألتك اذا القرار الك جاوبتا وقلتلها لأ

يعني أنا عملت طلب تثبيت علامة العملي أخدت الطلب و وحطيت البيانات ومشي الحال

وياما مسجلة بالجامعة بدل رفقاتي ودافعا رسوم التسجيل كمان

لأنو الموظفين عنا مابيجو الا بهالأسلوب

بس عجبتني انو رجعت وجاكرتا و ورجيتا قيمتا عنجد بتستاهل

موظفين الكلية عنا بدن واحد عينو قوية مشان يزوقو طبعاً مو كلون بس نسبة كبيرة

....تحياتي...

السلام عليكم

اتذكرت اليوم هالقصة يلي صارت معي

أول يوم امتحان بالفصل الأول بالسنة الأولى

كنت ما بعرف شو نظام الأسئلة ولا طريقة الامتحان ولا شي عن أسلوب الدكتور بوضع الأسئلة

كانت المادة ( هندسة تحليلية ) لدكتورها المعروف طبعا ( عصام ديبان )

المهم بعد ما مضيت كل الفصل وأنا عم احضر المحاضرات

شي عالواقف وشي ملحوشة بآخر مقعد وكانت أسوء محاضرة لأنو نسبة الرسوب فيها كبيرة كتير

كنا نشوف طلاب موقف تخرجون بس على هالمادة

المهم اجى الامتحان وفتت عالقاعة فوتت الواثق من نفسه

استلمت ورقة الأسئلة من هون وبلشت ارجف واعرق من هون

شو هااااااااااااااااااد شو هالأسئلة !!!!!!!!!!!!!!!!!!!!!!!!!

ولا واحد منون بعرفو ولا سؤال ولا حتى كلمة وحدة

ما فهمت شي

كنت بدي اصرخ وابكي

بس يا حزركون شو صار ؟؟؟

اغمى علي على المقعد

وهيك حتى الله رجعني للحياة حوالي الساعة عشرة الا ربع

كان ضالل تلات ارباع الساعة ليخلص الامتحان وأنا مو كاتبة ولا كلمة

بلشت اذكر الله وهدي حالي

وهيك طلعت معي الأجوبة وبلشت اتذكر

وعبيت ورقة الاجابة

بس الوقت خلص وما حسنت كمل السؤال الأخير

بالنهاية طلعت المادة ع 65

أما شو يوم ما بنساه

سلامتك ليلى بس منيح لحقتي تكتبي وطالعتي مادة
بس ماحدا حس عليكي وانت مغمى عليكي
تحياتي

الله يسلمك

لا والله محدي حس علي

بعدين أنا بطلة الاغماء

يعني شغلة عادية عندي

لسه من كم يوم وقعت من طولي لأني طولت بالسهرة شوي


لما اصحيت كان راسي ورمان وعم يوجعني ( لأني وقعت على السيراميك )

وعلى أي حالة عصبية أو توتر بصير معي هيك

شغلة نص ساعة أو ساعة بالكتير وبصحى

قصصكون كتير حلوة والذكريات تبعوت الجامعة ومواقفها سواء كانت مفرحة او حزينة جميلة لان بيضل ذكرة بقلوبنا وكل ماحنينا للماضي منتزكرها اما بالنسبة للمواقف فهنن جزء من اليوميات سواء كانت معي شخصياً او مع احد زملائي الاعزاء يلي بتزكرها.........بتمنى ترجع ايام الجامعة الحلوة بس هلأ مافي وجود للفرحة بوضعنا هاد الله يرجع غياب سوريا واهلها

ali.h كتب:

الله يرجع غياب سوريا واهلها

آمين

طيب شاركنا بشي قصة من قصصك

يعني أربع سنيين بالجامعة ماصار معك شي خرج ينحكى

هي قصة صارت مع وحدة من زميلاتنا بس كنت بظن حالي اني انا السبب والقصة:
كنا بالسنة الاولى وكنا عم نتعرف لسا عالجو وقبل المحاضرة بشوي انا بدخل عالقاعة مع رفقاتي وبحجز بتاني مقعد واذ بمجموعة بنات بيفوتو وبيحطو دفاترون بالمقعد الاول أدامنا وكان في وحدة معنا بعرفها لان معي بالعملي المخبر برمجة كان معا كاسة النسكافية وقعدو يشربو بالصف وقبل مايدخل الدكتور بشوي صرنا نتمارق عليهون انو ليش ماعزمتونا وضيفونا ومابيصير ههههه وهيك سخافات يعني بس من اجل لفت أنتباهون لعنا وتغير جو وهي البنت اتلبكت وخجلت وصارت ماتعرف كيف بدا تخلص من هالكاسة وبالغلط انكب معاها ولاغت حالها ورفقاتها والمقعد وصرنا نضحك والاحلى من هيك كان الدكتور عالباب يعني ياحرام بهالموقف ماعاد تعرف شو بدها تعمل تطلع برات القاعة ولا اتم بس انا طبعاً عطيتها محارم واعتزرنا من الدكتور مشان الفوضى وعطانا فرصة مشان انضف المقعد
انا حكيت القصة بشكل مختصر عمبدأ خير الكلام ماقل ودل
وان شاء الله اتكون القصة حلوة

ali.h كتب:

بس كنت بظن حالي اني انا السبب

لأ اتأكد انو انتي السبب

ياحرام عليكون بتكون بهدلت حالها وحواليها

حلوة القصة فعلا ما بتتنسى يسلمو للمشاركة

عفواً بس مادخلني انا نصيبها هيك يصير معها
هههههههه والله انا حباب وماني مأذي كتير حاج اتحسسيني بالذنب
انتو الاتحاد النسائي بتشحفو لبعض ههههههه
بس عنجد بتمنى ترجع ايام الجامعة الحلوة